الثلاثاء، 5 مارس 2013

ناس زمان : حكاية علال ومراتو طامو


دخل علال للبيت عيَّان باش يتسنط لعظامو 

دخلات مراتو طامو !!

خلاتو حتى نعس وغرق فأحلامو 

وبقات تقلب ليه فبزطامو !!

ناض شافها ڭال ليها اش كاديري يا هاد المرا 

راه البزطام خاوي فيه غا فلوس الكرا

واش بغيتي تهزيهم و نخرجو برَّا 

ڭالت ليه وا علال يهديك الله كاتشك فيا شحال من خطرة 

كاتنسا الزواج وتنسى العشرة 

انا راني مرتك واش غادي نبغيلك المضرَّة 


راه غي حليت البزطام باش نهز درهم ولا ربعين 

حيت بغيت نسيفط بنتك نسرين

للحانوت تجيب الدقيق والطحين 

راك صايم وبغيت ندير ليك شي مسمن يكون بنين

ولكن نتا دغيا قلتي العيب وخرجتي دوك العينين 

ومابقيتيتش تيق فيا من بعد گاع هاد السنين 

هو حس بالغلطة وحماضت القضية 

وقال ليها آمرتي طامو سمحي ليا 
راه انا لي شرفت ولّيت نشك مادّيش عليّا

ايوا دابا نوضي هزي لي بغيتي وسيفطي الدرية

تجيب ليك لي خاص باش ديري شي شهيوة هاديك هيا 

الحمد لله زوجت من عيالات زمان موالين النيّا !!

راني عارفك تبغيني وخّا يوقع لي وقع ماتفرطيش فيّا 

جاوباتو طامو معمرني نقدر نفرّط فتاج راسي ونـور عنيّا 

على شـكون عندي غيرك فهاد الدنيا 

تصالحو ومشات طامو للكوزينة توجد الفطور 

داز المغرب عاوتاني ناضت بالزربة دير السحور 

سعدات علال بطامو ....ياريت زمان إرجع لـور

كان كل راجل غـيعيـش فرحان ومسرور

رجـال اليوم مسـاكين كلشـي مقهـور

مع بنات اليوم لي ميعرفو يفرقو المعدنوس من القزبور

0 التعليقات:

إرسال تعليق